Mirliton 2023 - 23 fièsaovende later begoes 9 fibberwari de echte “marathon”. Ièrsj ’t Euregionaal Prinsetreffe dat veer same mèt oes Jeugprinsepaar en die van Sjin bezeukde. Eine hièl gezèllige aovend en geweldige artieste.Vriedes höbbe veer ein bezeuk gebrach aan VV Walram en zaoterdigmurrige woort de Prinsefoto gemaak. ’s Middes nog bie de luuj van Oosterbeemd geweas en aansjletend de Prinsereseptie van Gerlachuns. Mèt väöl man zeen veer dao heen gegange want veer moeste de nuèdige glaeskes beer drinke. Prins Sjaak is zoa sjtom gewaes um ziene skepter aan Koen te geve tiedes de proklemasie. Dus ja “Sjaak dae geuf ’n rundsje”! De maondig daonao höbbe veer ’t Knoevelemènt bezeuk in Mestreech en dinsdes houwe veer de Aovend van de Lach. Dizze aovend waor georganiseerd door de Oud-Prinse en -Ministersj. Onger ’t genot van van ’n heerlek dinee höbbe veer keihel gelache um de versjillende buutereednersj.Veer zaote same mèt ièregas Frans Crooneberg en zien vrouw aan taofel dae de aovend haet aafgesjlote met: Einmaol Prins te zeen. Donderdes sjtong ein bezeuk aan de sjoal in de Plenkertsjtraot op ’t program, wao Pascal nog ’n paar oud-onderwiezersj decoreerde mèt oeze pin.Vervolges zeen veer bie de Oud -Prinse en -Ministers aangesjlote um 11 menute euver 3 same mèt ’t Jeugprinsepaar ’t Ouwd Wief op te hange op ’t Thei Dorreplein. Nao eine gezèllige mieddig dao vertrokke veer nao ’t Walramplein en eupende dao ’t Auw wieverbal. Same mèt Frans Theunisz op de buun höbbe veer dat maoge doon. Nao ’n uurke gezelligheid op ’t Walramplein höbbe veer oes vaerdig gemaak veur ʻt ontvangs van de Blauw Sjuut.ʻt Waor geweldig um same mèt hun aan te komme op ’t Thei Dorreplein dat gans vol sjtong mit luuj. Tot in de late uurkes zeen veer doorgezak bie Brasserie America. Mèt ’n paar uurkes sjlaop en wiènig sjtum woorte veer de volgende murrige um 9 oer bie Hotel Voncken verwach. Hie haet ’t Gemeintebesjtuur ’t ontbijt georganizeerd. Nao ’n paar kièr ʻʻlalala gehakbal’’ te höbbe gezonge, koes de Burgervader zien toesjpraok houte, die 2 kièr op nuuj gedoon moos wère. Nao de toesjpraok en ’t oetzjweije van de Blauw Sjuut zeen veer nao de OBS in Brookem gegange. Um dat tot 15.00 oer nieks wiejer op ’t program sjtong, hub veer hièrlik bie Niels in de Stube vertoef. Dao höbbe veer oes good geammezeerd! In de bedoeling dat veer ’t neet te laat ginge make tiedes ’t Vallekebergtreffe in de aovend, kaome veer toch nog laat in bèd. Veer koeste toch redelik oetsjlaope, dachte veer…… totdat um 11 euver ach Zaate Hermenie Nieks Dao oes muzikaal kaom wakker make mèt ’n gehièl verzurrig ontbijt in eige hoes. Zie höbbe oes de ganse daag muzikaal begeleid nao de vastelaovesmès en ’t Inblaoze. Zóndes waor ’t tied veur de Sjleuteleuverdrach die dit jaor in de oape loch op ’t Thei Dorreplein plaatsj vong. Nog einigzins mèt ein gowe sjtum sjtonge veer klaor op ʻt plein. Dao woorte veer verrasj door ʻt ganse Vallekebergse Brandwaerkorps mèt toetersj en belle. Dit deeg oes allebei ech good. Nao dat de traone waore weggevaeg, höbbe veer oeze toesjpraok gehoute en daonao woort de bok in ’t Halderpark gevoord.
RkJQdWJsaXNoZXIy MTIwODg3