Mirliton 2023 - 20 Sjtadsprins Pascal I en ziene Minister Koen Zoa ein geweldig sezoen samevatte es Zjubilei-Sjtadsprinsepaar ies ’n lestige opgaaf. Veer numme uuch mèt teruuk nao jannewari 2021. Iech kin miech nog good heuge, iech zaot es 17-jaorige jóng op mien kamer te gamen, väöl andersj koes neet in Coronatied. Op ’n gegeve ougenbliek kaom pap obbersj mèt de vraog of iech Minister wol were. Iech sjtong mèt de mond vol teng, meh euver mien besjeid hoofde iech neet lang nao te dinke.Veer koeste Zjubilei-Prins en – Minister were, waal deende veer eine breef te sjrieve wao in veer motiveerde wiezoa veer Prins en Minister van Vallekeberg wolle were. Ein hauf oer gaove ze oes d’n tied, daonao belde ze oes teruuk.Veer houwe gein woord op papier gezat. Wie veer oeteindelek woorte gebeld, höbbe veer vanoet oes hart laote weite wat veer d’r van vonge. ’n Kerteerke later waor de kogel door de kèrk: geer gaot ’t nuuje Zjubilei-Prinsepaar van Vallekeberg were. Pap heat de ganse aovond mèt eine glimlach op zien geziech gezete. Diet waor veur höäm al van kindsaaf eine druim, dae noe oetkump. Van bliejdsjap zat ʻr ziech ’s aoves miene Jeugprinsensjteek oet 2014 op. Jao en ….dan ging de ganse veurbereiding beginne, ’t oetzeuke van oes kostuums, medaljes, ’t sjrieve van de proklemasie. ’t Lestigste en belangriekste waor, de mond houte tege ederein. Sjpannend waor ouch de foto’s make bie Nancy, hope datste geine bekinde op sjtraot tegekumps en zuut dat ste dao nao binne sjtaps. Óndertösje waore veer bezig mèt de veurbereidinge veur november, veer höbbe de broor van Pascal ein toneelsjtuk laote sjrieve, dat de jónges van de Raod moeste insjpreke. Aangezeen hae in Vaols woont koes toch nemes van die jónges häöm. Oeze buurman Zef höbbe veer ein decor laote sjildere mèt ’t sjmoesje dat ’t veur ein naefke van pap waor veur op sjoal. D’n daag van ʻt oetrope naoderde, in aanloup dao nao toe lepe de coronaciefersj flink op. De Vastelaovesnach zou doorgoon. De kostuums honge vaerdig, de zenewe lepe op, helaas krege veer d’n daag nao de peersjconferensie ein tillefoontje van Prizzedent Niels, dat alles aafgebloze woort. Dat waor natuurlek eine groate domper, meh veer houwe oes waal veurgenomme, veer doon ’t good of veer doon ’t neet!
RkJQdWJsaXNoZXIy MTIwODg3